28-07-2025
في قلب الصعيد، في بيوت الطين ووراء أبواب الحديد، بتحصل حكايات موجعة، أغلبها بيتكتم عليه، لكن ريحتها طالعة من القبور اللي بتستقبل شباب زي الورد راحوا في البحر، وسابوا وراهم أم بتصرخ، وأب مكسور، وأخ صغير لسه مش فاهم هو هيروح المدرسة ولا هيروح فيهم!
أسيوط، مشهورة برجالة وشبابها الجدعان، لكن للأسف، بقت كمان مشهورة بإنها من أكبر المحافظات اللي شبابها بيهاجروا هجرة غير شرعية.
ليه؟
لأن مفيش فرصة، مفيش أمل، مفيش غير شهادة على الحيطة وشغل في الشارع… أو مركب في البحر!
البحر بيبتلع أحلامنا
كل فترة نسمع عن مركب غرق، ونكتشف إن فيه شباب من قريتنا، من شارعنا، يمكن من بيتنا.
ناس باعت الدهب، ورهنت البيت، واستدانت علشان ابنها يسافر، قالوا “يطّلع يأكل عيش بره”، لكن البحر كان أسبق، راحوا في لحظة، مــ.ــاتوا في صمت، واتعصرت من الألم قلوب أمهاتهم.
مين السبب؟
غياب التنمية الحقيقية في الصعيد.
بطالة خانقة ومفيش مصانع أو فرص عمل حقيقية.
تعليم بيسلم شبابنا للإحباط.
وسماسرة المــ.ـوت اللي بيضحكوا على ولادنا ويبعوهم لتجار البشر.
وإحنا؟
إحنا لسه بنعد الجــثث، وبنكتب نعي جديد كل أسبوع، وبنرجع ننام في نفس البؤس، وكأن مفيش حاجة حصلت.
آن الأوان نقول كفاية!
مش المفروض الشاب يختار بين إنه يموت غرقان أو يفضل عايش ميت هنا.
مش المفروض أم تبعت ابنها وهي مش عارفة هتشوفه تاني ولا هتستلمه جــثة.
الحق في الحياة مش رفاهية، والعيش الكريم مش حلم مستحيل.
أسيوط تستحق أكتر.
ولادها يستحقوا يشتغلوا هنا، ويتجوزوا هنا، ويبنوا هنا.
مش يهاجروا في مراكب الموت علشان يدوروا على شوية كرامة.
التغيير مش هييجي لوحده، القرار بإيدنا.
لازم نحاسب، ونواجه، ونغير.
علشان نوقف نــزيــف الشباب اللي بيــموت في صمت.
حسام مصطفى
أمين الحزب بمحافظة أسيوط
عضو الهيئة العليا والمكتب السياسي للحزب
الرابط الأصلي للمقال:
كل الحقوق محفوظة © 2021 - الحزب المصري الديمقراطي الإجتماعي
تطوير وإدارة الموقع: مؤسسة سوا فور لخدمات مواقع الويب وتطبيقات الموبايل.