تحدث الدكتور/ فريدي البياضي؛ نائب رئيس الحزب المصري الديمقراطي الاجتماعي وعضو مجلس النواب عن الحزب تعليقًا على قانون زيادة رسوم وضرائب على السلع المستوردة قائلاً: أشكرك يا ريس لمنحي الكلمة ولا أشكر وزير الجباية. أقتبس بعض الأبيات اللي قالها مواطن مصري بسيط وأوجهها للحكومة.

الحكومة مش لاقية مصدر فلوس غير جيب المواطن ؟!

إفرض ضريبة على الكلام وعلى السلام وعلى الابتسام..

إفرض ضريبة على ابراهيم عشان بيشبه أخوه حسام..

إفرض ضريبة على اللي دقنه طويلة جدا

خد غرامة من الديوك إزاي من غير تصريح بتدن (تؤذن)..

إفرض ضريبة على الميت من المرض؛ لأنه مش لاقي الدوا..

وخد ضريبة من اللي ماشي وهو ساكت؛ ما هو ماشي يتنفس هوا..

افرض ضريبة على السعادة، سميها تمن الانبساط..

خد إتاوة من اللي نايمين على البلاط..

افرض ضريبة على الفقير لو كان يتمنى يمشي جنب قصر..

وافرض ضريبة على اللي ينطق اسم مصر..

افرض ضريبة على النجوم علشان بتطلع في السما..

وافرض ضريبة على العيون مش برضه أحسن من العمى..

واستكمل النائب : الحكومة جاية تقول إنها بتزود الرسوم على السلع الاستفزازية، ما فيش حاجة استفزازية أكتر من الحكومة واللي بتعمله .

وتابع مستنكراً: هو فنجان القهوة استفزازي ، ساعة اليد وماكينة الحلاقة استفزازية ولعبة الطفل استفزازية ؟! و دخول السينما والمسرح و السيرك استفزازي ؟!

مش قادر أتصور ان الحكومة دي جاية في الوقت دا وتفرض رسوم بالمنظر دا؟!

وانفعل النائب قائلاً : انا هبطل أطالب بإقالة الحكومة لفشلها ، أنا النهاردة باطالب بتوقيع الكشف الطبي على الحكومة لإن الحكومة اتجننت يا ريس! اللي يفرض رسوم زي دي في وقت زي دا مش ممكن يكون سليم!